آخر نجاحاتي ...... إتكسّر

من شوية مش كتير .... و أنا قاعد بتابع مسلسل من المسلسلات اللي غرقتنا مع بداية الشهر الكريم .... سمعت حاجة بتقع .... بتقع .... بتقع ناحية تحت -- طبعا بفعل الجاذب--  المهم ... بصيت بعد ما سمعت صوت عااالي بيقول "دِش ... دِش ... دِشششششششش" بصيت بصة درامية فظيعة و اللي حسبته لقيته و يريت اللي جرى ما كان وكل سنه و إنتم طيبين.... الساعة اللي كسبتها في مسابقة مدرستنا للثانوية العامة -- علشان أنا عقبال عيالكم كدة كنت طالع العاشر على مدرستي في تالتة ثانوي -- و بالرغم من إنها ساعة صيني متجبش عشرين جنية "أقل من أرخص ساندوتش عند مؤمن" إلا إن الساعة دي كان ليها مكانة خااااصة جدا جدا جدا عندي ... مكانتها كانت بتنحصر في إنها بتمثلي آخر نجاحاتي أو خلينا نقول بنبرة فيها تفائول أكتر .... أخر نجاحاتي حتى الآن ... بس ده خلاني أقول شوية كلام بجد جوايا ... خلاني أسأل نفسي ... إيه اللي ممكن يحصل لو ده كان آخر نجاح في حياتي بجد يعد ما دخلت دايرة الفشل اللا متناهي في الكلية العظيمة بتاعتنا دي؟؟

طيب إيه الحال لو كنت فشلت بجد ... هو أنا صحيح إخترت غلط ... طيب ليه نجاحاتي وقفت ؟؟ولا أنا مؤهل أصلا للنجاح ؟

أفكار كتييييييير أوي ملت دماغي ... لكن كلها سابتني و سابت جوايا حاجة .... الحاجة دي ببساطة هي أمل إن ممكن يجي يوم و أعدي فيه كل الضلمة دي لمكان فيه نور أكتر من كدا ... مكان ممكن أشوف فيه نفسي ناجح برغم إن كل المؤشرات دلوقتي بتقول إني مقداميش كتير

كومبارس صامت

إذا صدق يوسف بك وهبي لما قال "وما الدنيا إلا مسرح كبير"  يبقى المفروض إن كل واحد فينا بيلعب دور، وبيتقمصة كويس جدا جدا، علشان ساعة العرض ميحرجش نفسه قدام الناس اللي جايين من بعيد علشان يتفرجوا.... في ناس دورها كومبارس صامت و ناس دورها كومبارس متكلم ... و حاجات تاني كتير أوي، لكن اللطيف في مسرح الدنيا إنك مش علطول هتفضل في دورك ده ... لأ ... بجد لأ... خالص يعني.. بس حتى دي مش لينا دي لناس معينين بس بياخدوا بطوله علطول 

لما بتيجي تلعب دور واحد راكب الميكروباص و السواق مقضيها شتيمة في مخاليق ربنا و التباع نازل معاكسة في البنات ... دورك ساعتها كومبارس صامت و البطولة المطلقة لسيدنا الأسطى

بردو و إنت قاعد مع دكتور مرعب من مخلفات جوانتانامو، وقاعد يشرحلك "علمه" الممزوج بالسخرية و التهزيق وعمال يسألك "تعرف إيه عن مادتي إنت يا إبن .... إبن إمبارح طبعا"،  أوعى مخك يروح لبعيد، بردو ساعتها دورك مجرد كومبارس صامت أو بالكتير بتوزع إبتسامات و تهز راسك علشان تتقي شره. 

و إنت راكب المترو كل  يوم و عاوز تنزل في محطة رمسيس بررررردو كل دورك كومبارس صامت بتحط نفسك وسط التيار و تسيب الناس تنزلك من المترو بمعرفتها

يا راجل دا حتى و إنت بتحدد مستقبلك ... أحيانا كتير بتكون ، كومبارس صامت

لما تلاقي إن الأيام كلها بقت نسخة من بعضها و مفيش في إيدك أي حاجة ممكن تعملها و تبقى محبط و ملان و مش قادر تشوف أي لون للمستقبل، لأ و لما توصل معاك إنك خايف بكرا يجي لحسن تندم على النهاردة و نفسك النهاردة يخلص بردو لأنه مر أوي يبقى لازم تكون كومبارس صامت

إخوانا اللي بيقولوا إن الكومبارس ده ليه يوم هتمشي فيه الدنيا على مزاجه .... بقولهم لا مؤاخذة الكومبارس الذي طلبته ربما يكون صامتا برجاء إدخال نجمة قبل رقم الكومبارس لو كنت واصل وتعرف السيناريست

بس للأسف... ولا عشرين سيناريست ممكن يخلوا الكومبارس يتكلم لأنه محتاج جراح يعمل له زرع لسان